Victoria del Real Uviéu énte'l primer equipu de categoría que xugamos nesta pretemporada. Toño Velázquez amosó'l mesmu equipu que sacó en Xixón, camudando solo a Rotundo por Jonca. Nos primeros momentos del partíu, foi'l Valladolid quien punxo mas enfotu por llegar a la portería contraria, anque nun llegaben con peligru al allugamientu del "pileta" Pezzuti.

Nun pelotu que valtió'l porteru arxentín, llegó a Nacho García que foi quien a dexar un testerazu a Nacho Castillo pa que mandara la pelota a lo fonderu de la rede faciendo'l primeru de la tarde pa que los de Radio Sele glayaren al altu la lleva qu'esti muertu ta mui vivu.

Los de Pucela solo tuvieren dos ocasiones,nuna falta que sacó Víctor y nun testerazu de Borja. Nacho García tuvo a un tris de facer el segundu cuando taba finando la primera parte, nuna chilena qu'Alberto llegó a tocar pa mandala al palu.

Los de Valladolid ficieren seyes cambios na segunda parte pero nun-yos valió p'ameyorar nada. Nacho García fizo'l segundu y el mercenariu Losada algamó'l gol del Valladolid nún fallu de Ricardo. El gol definitivu foi de Michu que llogró batir a Jacobo zarrando un partíu afayadizu de los azules, quiciás el meyor de la pretemporada que ta a puntu de finar.


Copiado de narancoafayaizu.com