Esti añu los conseyeros del Uviéu decidieren remocicar tol equipu con decisiones impopulares como la de nun renovar a Diego Cervero, ensin dubia, el xugador que mas amor sintió por unos collores nos últimos años nel equipu de la capital. Lo que mas rocea espierta nel aficionáu del Uviéu, ye l'orixe de los nuevos fichaxes. Xugadores de l'Arxentina, la mayoría d'ellos, xugadores qu'inda nun demostraren nada, polo menos nun demostraren mas que los que yá taben equí.

Nun paez tampoco normal, qu'un equipu que tuvo opciones hasta los caberos partíos de la temporada pasada d'algamar la lliguilla, tea que desaniciar tola plantilla, como si nengún de los que taben, valiera pa esti añu. Cada vegada que dan anuncia del fichaxe d'un arxentín, de sópitu vien a la nuesa cabeza les famoses comisiones que tando dan de falar ente los representantes del otru charcu y les que queden pel camín. Estes son como les meigues que nun sabemos onde pero habeles hailes.

Per otru llau, ta'l tema de los rapazos de la cantera. Traxeren un paisanu de l'Arxentina pa potenciala y según les sos propies pallabres, los neños yeren los que diben trayer les perres al club cola so venta nun futuru y agora nos topamos con que la xente de la cantera que taba nel equipu, dan-yos una patada nel culu, los que teníen que xubir del xuvenil van cedelos y los que van acutar el so llugar, son paisanos que tan a milenta kilómetros d'Asturies.

Naguamos porque esti conseyu tea acertáu con esta política, de lo que nun hai dubia ye que son valientes. Son valientes porque nun nos queremos imaxinar al Uni ganando nel Tartiere colos Chema, Roberto, Peláez..... son valientes porque nun nos queremos imaxinar al Marino ganando na Iría colos Aliaga, Rubén, Guillermo.... Esperemos que-yos dea la razón el tiempu, porque sedrá'l bien de tolos sufridores azules, pero la cosa suelta un tufu de mui mal golor.


Copiado de narancoafayaizu.com